ᐅᖃᐅᓯᓕᕆᔾᔪᑎᓂᒃ ᑮᓇᐅᔭᖃᖅᑎᑦᑎᓂᖅ

ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᓄᑦ ᐱᕚᓪᓕᕈᑎᒃᓴᓄᑦ ᑮᓇᐅᔭᑦ

ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᒧᑦ ᐱᖁᔭᑦ ᓴᖅᑭᕈᑕᐅᓯᒪᕗᖅ ᑮᓇᐅᔭᓂᒃ ᐊᑐᐃᓐᓇᐅᓂᐊᖅᑐᓂᒃ ᐊᑐᕋᑦᓴᐅᔪᓂᒃ ᐅᑯᓄᖓ:

  • ᐃᓕᓴᕆᔭᐅᓯᒪᒍᑎᒃᓴᑦ ᐊᒻᒪᓗ ᓯᕗᒧᐊᒃᐸᓪᓕᐊᒍᑎᒃᓴᑦ ᓇᓕᒧᒌᑦᑎᑕᐅᓂᖏᓐᓂᒃ, ᐱᔪᓐᓇᐅᑎᓂᒃ ᐊᒻᒪᓗ ᐊᑐᖅᑕᐅᔪᓐᓇᐅᑎᖏᓐᓂᒃ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ;
  • ᓴᓐᖏᓂᕆᔭᐅᔪᓂᒃ ᐊᑐᕆᐊᒃᑲᓐᓂᕈᑎᒃᓴᑦ ᑎᑎᖅᑭᕆᓂᕐᒧᑦ ᐊᒻᒪᓗ ᐃᓕᖅᑯᓯᕐᒨᖓᔪᓂᒃ ᓇᓗᓇᐃᖅᓯᓂᕐᒥᒃ ᐃᓕᓴᕆᔭᐅᓯᒪᔪᓂ ᐅᖃᐅᓯᕐᓂ, ᐊᑐᖅᑕᐅᓗᑎᒃ ᑕᒪᕐᒥᒃ ᐱᕙᓪᓕᐊᔪᓕᕆᔨᐅᔪᑦ ᖃᓄᐃᑦᑐᑐᐃᓐᓇᐃᑦ;
  • ᐱᕚᓪᓕᑎᑦᓯᓂᖅ ᐃᓄᐃᑦ ᐅᖃᐅᓯᖓᒍᑦ ᑎᑎᖅᑭᕆᓂᕐᒥᒃ ᐊᒻᒪᓗ ᐊᔪᕈᓐᓃᕈᑎᒃᓴᐅᔪᓂᒃ ᐊᒻᒪᓗ ᓴᖑᑎᑕᐅᖔᕐᓗᓂ ᐅᖃᐅᓯᐅᑉ ᐊᑐᖅᑕᐅᒍᓐᓃᐸᓪᓕᐊᓂᕆᓯᒪᔭᖓ ᐊᒻᒪᓗ ᑲᑎᑦᓯᖃᑦᑕᕐᓂᖅ ᐅᖃᐅᓯᕐᓂᒃ;
  • ᐋᖅᑭᑦᓱᐃᓂᖅ ᐊᒻᒪᓗ ᐆᒻᒪᑎᑦᓯᒋᐊᒃᑲᓂᕐᓂᖅ ᐃᓄᐃᑦ ᐅᖃᐅᓯᖓᓂᒃ ᐊᒻᒪᓗ ᐃᑲᔪᖅᓯᓯᒪᓂᖅ ᐊᑐᖅᑕᐅᖏᓐᓇᕈᑎᒃᓴᖓᓂᒃ ᐅᖃᐅᓯᐅᑉ ᐃᓕᓐᓂᐊᓂᒃᑯᑦ, ᐃᖅᑲᓇᐃᔭᕐᓂᒃᑯᑦ ᐊᒻᒪᓗ ᖃᐅᑕᒫᖅᓯᐅᑎᓂ ᐃᓅᓯᕐᒥ ᓄᓇᕗᒻᒥ;
  • ᐱᕚᓪᓕᑎᑦᓯᒋᐊᕐᓂᖅ ᐃᓄᓕᒫᓄᑦ, ᑲᓇᑕᒥ ᐊᒻᒪᓗ ᓯᓚᕐᔪᐊᒥ ᐅᔾᔨᕆᔭᐅᓕᖅᐹᓪᓕᕈᑎᒃᓴᖓᓂᒃ ᐊᒻᒪᓗ ᑐᑭᓯᐅᒪᔭᐅᒍᑎᒃᓴᖓᓂᒃ ᑖᑦᓱᒪ ᐱᖁᔭᐅᑉ, ᐃᓕᓴᕆᔭᐅᓯᒪᔪᓄᑦ ᐅᖃᐅᓯᕐᓄᑦ ᐱᖁᔭᖅ ᐊᒻᒪᓗ ᑎᑎᖅᑭᕆᓂᕐᒧᑦ ᐊᒻᒪᓗ ᐃᓕᖅᑯᓯᕐᒨᖓᔪᓂᒃ ᐃᑲᔫᑎᖃᕐᓂᖓ, ᐱᖅᑯᓯᕆᔭᐅᓯᒪᔪᓂᒃ ᐊᒻᒪᓗ ᓂᕆᐅᒋᔭᐅᓂᖓᓂᒃ ᓄᓇᕗᒥᐅᓄᑦ;
  • ᓴᕐᖓᑎᑉᐹᓪᓕᑎᑦᓯᓂᖅ ᐆᒪᑎᑕᐅᒋᐊᒃᑲᓐᓂᕈᑎᒃᓴᖓᓂᒃ ᐅᐃᕖᑦ ᐊᒻᒪᓗ ᐃᓄᐃᑦ ᐅᖃᐅᓯᖏᑦ ᐊᒻᒪᓗ ᓴᖅᑭᐅᒪᑎᑦᓯᓂᖅ ᓈᖕᒪᑦᓯᐊᕐᓂᖓᓂᒃ ᐊᕙᖕᒧᑦ ᐃᓕᖅᑯᓯᕐᒥᒍᑦ ᓇᓗᓇᐃᖅᓯᒍᓐᓇᕐᓂᖏᑦ ᐊᒻᒪᓗ ᐊᖏᖅᓯᒪᓂᖏᓐᓂᒃ ᐃᓅᖃᑎᒌᑦᓯᐊᕈᓐᓇᓂᕐᒥᒃ ᓄᓇᕗᒻᒥ.

 ᐊᐅᓚᑦᓯᔾᔪᑏᑦ ᓴᖅᑭᖅᑕᐅᓂᐊᖅᑐᑦ ᖃᓄᖅ ᑖᒃᑯᓄᖓ ᐊᐅᓚᑕᐅᔪᑦ ᖃᐅᔨᓴᖅᑕᐅᔪᓐᓇᕐᒪᖔᑕ.

 ᖃᓄᕐᓕ ᑖᒃᑯᐊ ᑮᓇᐅᔭᖅᑖᕈᑕᐅᓂᐊᕐᒪᑕ?

 ᐊᑭᓖᑎᑦᓯᖃᑦᑕᓂᒃᑯᑦ ᐃᖅᑲᖅᑐᐃᕕᒃᑯᑦ ᑎᓕᓯᔾᔪᑕᐅᔪᓂᒃ ᓯᖁᒥᑦᓯᔪᓂᒃ ᐅᖃᐅᓯᕐᒧᑦ ᐱᔪᓐᓇᐅᑎᓂᒃ ᑐᕌᖓᑎᑕᐅᔪᓐᓇᖅᑐᑦ ᑖᒃᑯᓄᖓ ᑮᓇᐅᔭᓄᑦ ᐃᖅᑲᖅᑐᐃᕕᒃᑯᓐᓂᒃ. ᐅᖃᐅᓯᓕᕆᓂᕐᒧᑦ ᒥᓂᔅᑕ ᓴᓂᕐᕙᐃᓯᒪᔪᓐᓇᕐᒥᔪᖅ ᑮᓇᐅᔭᓂᒃ ᑕᕝᕗᖓ ᑮᓇᐅᔭᖃᕆᐊᓕᖕᓄᑦ, ᐊᒻᒪᓗ ᐃᑲᔫᑎᓂᒃ ᑐᓂᔭᐅᑐᐃᓐᓇᖅᑐᓂᒃ ᐱᖃᑦᑕᕈᓐᓇᓂᐊᕐᒥᔪᑦ.